அஸ்ஸலாமு அழைக்கும் !
அல்லாஹ்வின் திருபெயரால் ....
வாழ்வதற்காகத்தான் அல்லாஹ் நம்மை படைத்தான். வீணாக அழுவதற்காகவும் , அழிவதற்காகவும் அல்லாஹ் நம்மை படைக்கவில்லை . எல்லாம் என் தலைவிதி ! என்று கடந்த காலத்தை எண்ணி வருந்துவது , என்ன செய்யப் போறமோ ! தெரியலையே ! என்று எதிர் காலத்தை எண்ணி ஏங்குவது நமது பலகீனமாக உள்ளது. வாழ்க்கையை கசப்பாக்குவதும் இனிப்பாக்குவதும் நமது கையில் அல்லாஹ் தந்துள்ளான் .
நெருப்புக்கு மத்தியிலிருந்து மகிழ்வடைய எப்படி முடியும் ? வெள்ளத்திற்கு நடுவில் எப்படி நிம்மதி கொள்ள முடியும்? அல்லாஹ்வின் அருள் இருந்தால் எல்லாம் முடியும். நெருப்பு குழிக் குள்ளே இருந்து ஹஜ்ரத் இப்ராஹீம் நபி (அலை) அவர்களும், நைல் நதியின் நடுவில் ஹஜ்ரத் மூஸா நபி (அலை) அவர்களும் நிம்மதி பெறவில்லையா ?
ஆக, அல்லாஹ்வை எல்லையாகக் கொண்டு வாழும் மனிதனுக்கு தொல்லையில்லை என்பதை நாம் உணர்ந்து கொள்ள வேண்டும். இன்பம் வந்தாலும் அல்ஹம்துலில்லாஹ் " ! துன்பம் வந்தாலும் அல்ஹம்துலில்லாஹ்! என்று அல்லாஹ்வை நாவால் புகழ வேண்டும் !
"என்ன பிழைப்பு செத்த பிழைப்பு பிழைப்பா இது ? பேசாம செத்துறலாம். எதோ வண்டி ஓடுது! ச்சே நாய் பிழைப்பா போச்சு " என்று புலம்புபவர்களை நாம் பார்க்கிறோம். இது இயலாதவர்களின் அடையாளமாகும் . நல்ல வாழ்க்கை அமைந்திட அண்ணல் நபி (ஸல்) அவர்கள் நல்ல பல உபதேசங்களை செய்துள்ளார்கள் .
"உண்மையை மட்டும் பேசு! தேவையானதை மட்டும் பேசு! . பொய் ,கொள் புறம், அவதூறு , இட்டுகட்டுதல் எதையும் பேசவே கூடாது . நபி(ஸல்) அவர்கள் கூறினார்கள். உடல் உழைப்பால் நீ சாப்பிடு ! பிறருக்கும் கொடு பிறரிடம் யாசிக்க்காதே ! யாசிப்பவனை நிந்திக்காதே!
ஒன்றும் தெரியாத மக்களாக , ஆடுமாடு ஒட்டகங்களை மேய்ப்பதை மட்டுமே வாழ்வாகக் கொண்டிருந்த மக்களை நேர்வழி காட்டி , மார்க்கத்தின் ஞானங்கலை ஊட்டி ,நபித்துவ ஒளியான குர் ஆனை காட்டி மனனமிடச் செய்து அல்லாஹ்வால் பொருந்திக் கொண்ட மக்களாக புனிதர்களாக ஆக்கினார்கள் அண்ணல் நபி(ஸல்) அவர்கள். கண்ணியம் பெற்ற இந்த இறைத்தூதர் நபி(ஸல்) அவர்களின் தோழர்கள் , உலக மக்களை நன்மையின் பக்கம் அழைத்தார்கள் . யுத்த களங்களில் தன்னுயிர்களை தியாகம் செய்து இஸ்லாத்தை காத்தார்கள் . இறை வணக்கங்களில் ஈடு இணையற்ற திகழ்ந்தார்கள் . கொடுக்கல் வாங்கலில் ஹலாலை பேணி ஹராமை தவிர்த்தார்கள்.
சுற்றத்தாரிடம் ,அண்டை வீட்டார்களிடம் , ஏழைகளிடம் மிகவும் நேசமுடனும் உதவியும் செய்துவந்தார்கள் . மாநபி (ஸல்) அவர்களுடன் அருமைத் தோழர்களான சஹாபா பெருமக்கள் கலந்துறவாடி கற்றுக் கொண்ட கல்வி ஞானங்கலை உலகெங்கும் பரப்பிட சென்றுவிட்டார்கள்.
எனவேதான் பலலட்சம் சஹாபாக்கள் வாழ்ந்த புனித மக்காவில் சங்கைமிக்க மதீனாவிலும் சில ஆயிரம் சஹாபாக்களின் மண்ணறைகள் மட்டுமே உள்ளன . மற்றவர்கள் இஸ்லாமிய சுடர் ஏந்தி உலகின் எண் திக்குகளிலும் சென்று அடக்கமாகிவிட்டார்கள். யார்? எந்த மனிதர் அல்லாஹ்வுடைய அன்பையும் அருளையும் பெற வேண்டும் என்று எண்ணுகிறாரோ , நேர்வழியில் தன்னை அல்லாஹ் நடத்த வேண்டும் என்று நினைக்கிறாரோ அவர்கள் அல்லாஹ்வை ஈமான் கொண்டு அவனது வழியை பலமாக பற்றிப்பிடித்திர வேண்டும்.
ஹஜ்ரத் அம்ரிப்னு ஆஸ் (ரலி) அவர்களின் மரணநேரத்தில் ஒரு சுவற்றின் பக்கம் முகத்தை திருப்பி அழுது கொண்டிருந்தார்கள் . அருகிலிருந்து அவர்களின் மகன் "தந்தையே! உங்களின் நண்பர் நபி(ஸல்) அவர்கள் உங்களுக்குச் சுபச் செய்தி சொல்லியிருக்கிறார்கள் அல்லவா! பின்பு ஏன் அழுகிறீர்கள் "? என்றார். அதற்க்கு அம்ரிப்னு ஆஸ் (ரலி) அவர்கள் கூறினார்கள் : "ஒரு காலத்தில் நபி(ஸல்) அவர்கள் மீது வெறுப்பு கொண்டவன் என்னைப்போல் யாரும் கிடையாது . அந்த நபியை கொன்று விட பலமுறை சந்தர்பங்களை எதிர்பார்த்து வெறியாக அலைந்தேன் . இது என் வாழ்நாளில் மோசமான நாளாகும் . இதே நிலையில் நான் மரணித்திருந்தால் நிச்சயம் நான் நரகவாசியாக ஆகியிருப்பேன் . ஆனால் , அல்லாஹ் எனக்கு நேர்வழி காட்டினான் . அதன் பின்பே நபியவர்களை சந்திக்கும் சந்தர்ப்பம் கிடைத்தது . அவர்களின் அருகில் சென்று " உங்களிடம் பைஅத் செய்திட கரங்களை நீட்டுங்கள் " என்றேன் உடனே நபியவர்கள் நீட்டினார்கள்.
"யா ரசூலல்லாஹ் ! உங்களிடம் சில நிபந்தனைகளிட விரும்புகிறேன் " என்றேன் 'என்ன நிபந்தனை ?' என்றார்கள் . என் பாவங்கள் எல்லாம் மன்னிக்கப்பட வேண்டும் அதிகமாக பாவம்தான் செய்துள்ளேன் . என்னை அல்லாஹ் மன்னிப்பானா ? இஸ்லாமை நீ ஏற்றுக்கொண்டால் பாவம் நீங்கும் , ஹஜ் செய்தால் பாவம் நீங்கும் ' என்றார்கள் நபி (ஸல்) அவர்கள். அதன்பின் இஸ்லாமான எனக்கு நபியைவிட உலகில் மிக விருப்பமானவராக என் பார்வையில் எவருமில்லை . எழ்மையாக அறிவில்லாதவனாக இருந்த என்னை ஈமான் உயர்வாக்கி செல்வனாக்கியது " என்று ஹஜ்ரத் அம்ருப்னுல் ஆஸ் (ரலி) அவர்கள் கூறி முடித்தார்கள்.
நமது உயர்வுக்கும் இருலோக வெற்றிக்கும் வழி அல்லாஹ்வை வழிப்படுவதில் மட்டுமே உள்ளது . அல்லாஹ்வுக்கு வழிப்பட்ட நல்லடியார்களில் அல்லாஹ் நம் அனைவரையும் சேர்த்தருள் புரிவானாக! ஆமீன்.........................
அல்லாஹ் மிக அறிந்தவன் .
கருத்துகள் இல்லை:
கருத்துரையிடுக
Welcome to your comment!