எல்லாப் புகழும் புகழ்ச்சியும் அல்லாஹ் ஒருவனுக்கே !
அல்லாஹ்வின் தூதர் [ஸல்] அவர்கள் கூறினார்கள் ..
நான் அறிவதை நீங்கள் அறிவீர்களாயின் நிச்சயமாக குறைவாகச் சிரிப்பீர்கள்,, அதிகமாக அழுவீர்கள்.
இதை அபூஹுரைரா [ரலி] அவர்கள் அறிவிக்கிறார்கள் .
அல்லாஹ்வின் தூதர் [ஸல்] அவர்கள் கூறினார்கள்..
மன இச்சைகளால் நரகம் மூடப்பட்டள்ளது. சிரமங்களால் சொர்க்கம் மூடப்பட்டுள்ளது .
இதை அபூஹுரைரா [ஸல்] அவர்கள் அறிவிக்கிறார்கள்.
ஆதாரம் ..புகாரீ]
அல்லாஹ்வின் ஆற்றல் , அவன் தனக்கு மாறுசெய்கின்றவர்களைத் தண்டிக்கும் விதம் , மரணம் , மண்ணறை , மறுமை நாள் ஆகியவற்றின் பயங்கரம் போன்ற விஷயங்களின் யதார்த்த நிலையை நபி [ஸல்] அவர்கள் அறிந்ததைப் போன்று மற்றவர்களும் அறிந்தால் சிரிப்பே வராது,, அழுகைத்தான் வரும். அப்படியே சிரித்தாலும் குறைவாகவே சிரிப்பார்கள்,, அதிகமாக அழுவார்கள் . அந்த அளவுக்கு அவற்றின் பயங்கரம் கடுமையானதாக இருக்கும் . [ஃபத்ஹுல் பாரீ ]
அதாவது மன இச்சைகள் என்ற திரைக்கப்பால் இருப்பது நரகம்தான். அல்லது மன இச்சைகள் என்ற மூடியை திறந்துகொண்டு பார்த்தால் அங்கு தெரிவது நரகம்தான் . மன இச்சைகளின்படி வாழ்வது நரகத்திற்குத்தான் வழிவகுக்கும். மன இச்சைகள் என்பது மார்க்கம் தடை செய்துள்ள இம்மைச் சுகங்களைக் குறிக்கும். இந்த மன இச்சைகளின்படி நடந்தால் ஒன்று , தடை செய்யப்பட்டள்ள செயல்களைச் செய்ய வேண்டியது வரும் . அல்லது கடமையானாவற்றைக் கைவிட வேண்டியது வரும். இந்த இரண்டு நிலைகளுமே நரகத்திற்கு வழிவகுத்துவிடும் . இதைப் போன்றே , சிரமங்கள் என்ற திரைக்கப்பால் சொர்க்கம் இருக்கிறது. மார்க்கக் கடமைகளை நிறைவேற்றுவதும், மார்க்கம் தடை செய்துள்ளவற்றிளிருந்து விலகி வாழ்வதும் சுமைகளாகத் தெரியலாம் . ஆனால், அந்தச் சுமைகளைத் தாங்கினால்தான் சொர்க்கம் என்ற சுவை கிடைக்கும். [ஃபத்ஹுல் பாரீ ]
நபி [ஸல்] அவர்கள் கூறினார்கள்..
சொர்க்கம் உங்களின் செருப்பு வாரைவிட உங்களுக்கு மிக அருகில் உள்ளது. நரகமும் அதைப் போன்றே [மிக அருகில் உள்ளது]
இதை அப்துல்லாஹ் பன் மஸ்ஊத் [ரலி] அவர்கள் அறிவிக்கிறார்கள்.
ஆதாரம் ..புகாரீ]
அதாவது சொர்க்கமும் , நரகமும் நமக்கு அருகிலேயே உள்ளன. நாம் செய்கின்ற ஒரு சிறு நன்மையின் காரணத்தால்கூட இறைவன் நமக்குச் சொர்க்கத்தை வழங்கிவிடலாம் . இதைப் போன்றே நமது பார்வையில் மலிவாக தெரியும் ஒரு குற்றத்தால் நரக வேதனை அளிக்கப்பட்டுவிடலாம் . ஆகவே , நன்மை சிறிதே ஆயினும் அதைச் செய்யத் தவறக் கூடாது. சிறிய பாவமாயினும் அதைக் கைவிடத் தவறக் கூடாது. எந்த நன்மையின் மூலம் இறையருளுக்கு இலக்காவோம்,, எந்தப் பாவத்தால் இறைமுனிவுக்கு ஆளாவோம் என்பது யாருக்கும் தெரியாது.[ஃபத்ஹுல் பாரீ ]
அல்லாஹ் மிக்க அறிந்தவன் .
ஹதீஸ் உடைய எண்ணை குறிப்பிட்டிருந்தால் நன்றாக இருக்கும்
பதிலளிநீக்கு